哥哥張國榮 對於我黎講，代表一個我似曾相識、素未謀面嘅香港，一個值得懷念，值得寵愛嘅香港。
要理解一個如Leslie一樣嘅artist，未必可以一次過聽曬佢個discography。由零開始，佢嘅佢80年代巔峰時期嘅歌，以差唔多粵劇腔所唱嘅《為你鍾情》、《Summer Romance ‘87》都係我入坑嘅作品。特別係我媽以前係屋企唱嘅“少女心事”，同埋我臨走之前去南丫島飲酒，坐係沙灘聽“風繼續吹”，都係對我黎講非常personal嘅歌。 雖然我未去過disco，唔知咩叫rave party， 但係我從佢嘅訪談、佢嘅歌詞中，彷彿睇到80s香港光輝大時代嘅縮影。
哥哥第一首真正令我感到驚嘆嘅歌，應該係“風再起時”。當時應該係考完DSE冇幾耐，我搵佢最出名嘅幾首歌黎聽，然後發現呢首。
我 浮沉了十數年
在星空裡閃 帶著惘然
請你容我別去前
贈出這闕歌 來日某天再相見
-“風再起時”
我當時同呢首歌resonate到佢去加拿大又要走又唔捨得嘅cognitive dissonance，而呢首歌更加催使我去了解哥哥同佢嘅歌。“當年情” 同 “飛機師的風衣”都係我同期鍾意佢嘅作品。 佢唱快歌嘅時候靚仔到絕，舞台魅力max，而唱慢歌嘅時候把聲非常細膩、真摯，經常令我諗起佢《金枝玉葉》唱“追”嗰一幕。
要講我最鍾意嘅era, 一定係《熱情演唱會》。佢回歸樂壇後三個album嘅artistry，絕對係香港前無古人後無來者。佢長頭髮又留鬚嘅造型， 同佢之前喺跨越97“紅”嘅高踭鞋跳舞，都係佢androgyny美感最靚最正嘅時候。佢係《熱情》裏面快歌串燒，通俗d黎講就是serving c*nt，白底牛仔造型又型又索，台風超正。我應該睇左《熱情》60次咁上下，個album返學聽、放學聽。佢 inspire 我挑戰beyond gender norms風格嘅fashion，唔怕別人眼光去做自己。佢呢個era嘅“路過蜻蜓”、“陪你倒數”同我最鍾意嘅“夢到內河”更加係反映到佢experiment嘅決心。邊個唔get《熱情》可以同我傾下，佢呢場演唱會應該係香港樂壇數一數二嘅視覺、聽覺享受。
哥哥人美心善、多friend嘅事蹟聽得多，難怪香港人就對佢同梅姐兩個咁好、咁掛住佢地。我更加多謝佢為香港帶來LGBT嘅representation：佢係《家有囍事》、《霸王別姬》、《春光乍洩》嘅演出，證明佢唔單止係一個歌手同演員，佢係一個藝術家。我之前係twitter聽過：”true beauty is not shown, it is evoked.“ 佢嘅cultural contribution比邊個都多，香港唔會忘記佢帶俾我地嘅片刻美麗。佢嘅人格魅力，出自於佢對藝術嘅嗰份熱誠，猶如Icarus般嘅天之驕子；可惜佢可能為左追求完美、追求美麗而飛得太高，最後雙翼被太陽融化而跌下。佢為藝術而生，為藝術而犧牲。
講咁多，其實最後並唔係想拋書包，我知道我距離做高le哥迷應該有排追。我追張國榮同追我其他偶像唔同，佢唔係我romanticize嘅對象，唔係我迷之瘋狂，來得快去得快嘅偶像。我要慢慢聽佢嘅歌，了解佢嘅過份美麗，從而搵出更多鍾意佢嘅原因。呢個4月1日，我身為03年尾出世嘅fan，雖然未見過哥哥、未見證過佢出碟、拍戲嘅時候，但係希望通過我對佢嘅敬佩、佢嘅寵愛，可以令係天堂嘅佢，知道佢對香港嘅貢獻。佢好多歌我聽過，更多歌我未聽過。我會繼續loop《紅》、《陪你倒數》同《大熱》，得閒就繼續從佢嘅discography發掘更多hidden gems。老實講，我唔係好捨得再聽更多我未聽過哥哥嘅歌，因為我知道，聽一首，就少一首“新歌”。總有一天我會聽完佢嘅歌、睇曬佢嘅戲，但係嗰日蒞臨之前，我知道我同佢無數fans一樣，願意今生約定他生再擁抱。。。